ଡାକି ଆଣେ ଯିଏ ଦୁଃଖକୁ ସର୍ବଦା
ନାଁଟି ତାହାରି ତମ୍ୱାଖୁ ,
ଭାଙ୍ଗଇ ଯିଏ ରେ ତୋ ଘର ସଂସାର
ଲୁହ ଦିଏ ରେ ଆଖିକୁ !!
ଧିରେ ଧିରେ ନିଶା କରଇ ସେ ଜାଣ
ଘାରିଲେ ନ ଛାଡେ ସିଏ ,
ଜାଣି ଜାଣି ଡାକି ଆଣନ୍ତି ଦୁର୍ଦ୍ଦିନ
ତମ୍ବାଖୁ ଖାଆନ୍ତି ଯିଏ !!
ଜଣା ପଡେ ନାହିଁ ଚାଲିଯାଏ ଧନ
ତମ୍ବାଖୁ ପଛରେ ଧାଇଁ ,
ଶେଷରେ ରହେ ରେ ଯେଉଁ ଜୀବନଟା
ତାକୁ ବି ଯାଏ ସେ ନେଇ !!
ହୃଦରୋଗ,କର୍କଟ ନାନାଦି ବ୍ୟାଧିର
ଜଡ ଅଟଇ ତମ୍ୱାଖୁ ,
ତମ୍ବାଖୁ ସେବନ ଛାଡିଲେ ସିନା ରେ
ହରାଇବା ସେ ରୋଗକୁ !!
ତମ୍ୱାଖୁ ସେବନ କେବେ ପୋଛି ଦିଏ
କାହା ମଥାର ସିନ୍ଦୂର ,
କେବେ ପୁଣି ସିଏ ଛଡ଼ାଇ ନିଏ ରେ
କାହା କୋଳରୁ କୁମର !!
କେବେ ପୁଣି କିଏ ହରାଏ ମାଆକୁ
ତମ୍ୱାଖୁ ସେବନ ପାଇଁ ,
କାହିଁ ପାଇଁ ନିଜେ ନିଜ ସର୍ବନାଶ
ଡାକୁଅଛ ଜାଣ ନାହିଁ !!
ଅନୁରୋଧ କରେ ସମସ୍ତଙ୍କୁ ଆଜି
ହୋଇ ସବୁ ଏକ ମନ ,
ହରାଇବା ଆମେ ରୋଗ,ବ୍ୟାଧି ସବୁ
ତମ୍ବାଖୁ କରି ବର୍ଜନ !!
ବଞ୍ଚାଇବା ଧନ,ବଞ୍ଚିବ ଜୀବନ
ତମ୍ୱାଖୁ ହୋଇଲେ ଦୂର ,
ମାନସିକ ସାଥେ ଶାରୀରିକ ଶାନ୍ତି
ହୋଇବ ରେ ଏକାକାର !!
କରିବା ଶପଥ ହୋଇ ଏକମତ
ତମ୍ୱାଖୁ କରିବା ଦୂର ,
ସୁସ୍ଥ ସମାଜକୁ କରିବା ଗଠନ
ନଥିବ ତମ୍ବାଖୁ ଡର !!
•••ସମାପ୍ତ•••
ନାମ :ବର୍ଷା ରଥ
0 Comments