ଆମ ସ୍କୁଲ ସାର୍ - ହାସ୍ୟମୟୀ ରାଜ୍

ଜୀବନରେ ମୋର ଯାହାଙ୍କର ସ୍ବର

ତୋଳିଛି ଅଲିଭା ସ୍ଵାକ୍ଷର

ସ୍ମୃତିରେ ମୋର ସଦା ଯେ ଜୀବନ୍ତ

କେବେ ନୁହେଁ ଭୂଲିବାର । 

ସିଏ  ଆମ ପ୍ରିୟ ସ୍କୁଲ ସାର୍ ।।

କେତେ ମୁଁ ଖାଇଛି ମିଠା କାନମୋଡା

ସ୍ନିଗ୍ଧ ହାତ ଆଙ୍ଗୁଠିର

କେତେ ଚପଳାମି ପିଲାଦିନ ମୋର

ତାଙ୍କର ବେତ ପାହାର ।

ସିଏ ଆମ ପ୍ରିୟ ସ୍କୁଲ୍ ସାର୍ ।। 

ଖିଲାପ କରେନି ପାଠରେ ମୁଁ କେବେ

ଗେହ୍ଲା ଥିଲି ଯେ ତାଙ୍କର

ସ୍ନେହର ଆଶିଷ  ଆଜିବି ଝରୁଛି

ସତେ ମଥାପରେ ମୋର ।

ସିଏ ଆମ ପ୍ରିୟ ସ୍କୁଲ୍ ସାର୍ ।। 

ସେଦିନ ସିଲଟ ଅକ୍ଷର ତାଙ୍କର

ମନେପଡେ ବାର ବାର

ସ୍ମୃତିରେ ସାଇତା ମୋ ଖାତା  ଉପରେ

ଦସ୍ତଖତ ଯେ ତାଙ୍କର ।

ସିଏ ଆମ ପ୍ରିୟ ସ୍କୁଲ୍ ସାର୍ ।। 

ସ୍କୁଲ ଜୀବନ ଅନନ୍ଯ ମହାନ

ସେ ଥିଲେ ଅତି ଆପଣାର

ଅମୃତ ବୋଳା ସେ ନାମକୁ ସ୍ମରିଲେ 

ଲୁହ ବହେ ଝର ଝର  ।

ସିଏ ଆମ ପ୍ରିୟ ସ୍କୁଲ୍  ସାର୍  ।। 

ହାସ୍ୟମୟୀ ରାଜ୍

ଓରାଳି, ହାଟଡିହି, କେନ୍ଦୁଝର ।