ଉପହାର ଦେବା ପାଇଁ - ସୁମନ୍ତ ବେହେରା

ତୁମପାଇଁ ସଖି ଜହ୍ନ ରାଇଜକୁ ,

    ଯାଇଥିଲି ଦିନେ ମୁହିଁ 

ଜହ୍ନ କୁ ଆଣିଣ ତୁମକୁ ପ୍ରିୟା ଗୋ ,

    ଉପହାର ଦେବା ପାଇଁ ।।

ତୁମ ନାମ ଶୁଣି ଚନ୍ଦ୍ରମା ହସିଲେ ,

    ଦେଲେଣି ମୋତେ ହେ ଧରା 

କହିଲେ ସେ ମୋତେ ତୋ ପ୍ରିୟା ର ମୁଖ ଟି ,

    ମୋ ଠାରୁ ସୁନ୍ଦର ପରା।। 

ସେଠାରୁ ଆସିକି ତାରା ଗଣ ପାଶେ ,

     ଅଟକି ଯେବେ ମୁଁ ଗଲି 

କିଛି ନ କହୁଣୁ ଆଗୁଆ କହିଲେ ,

    ଆମେ ନୁହଁ ଯୋଗ୍ୟ ବୋଲି ।।

ଉପବନେ ଗଲି କୁସୁମ ପାଖକୁ ,

     ଫୁଲ ଟିଏ ପାଇଁ ମୁହିଁ ।

ଗଛ ଡାଳେ ଥାଇ କୁସୁମ ହସିଲା ,

    ମୋ ପାଖେ ଆସିଲା ନାହିଁ ।। 

କହୁଥିଲା ସିଏ ତୁମରି ମହକ ,

     ତା ଠାରୁ ଅଧିକ ବୋଲି 

ମହୁ ଠାରୁ ବି ମଧୁର ଲାଗିବ ,

      ହସିଦେଲେ ତୁମେ ଖାଲି ।।

ଶେଷ ରେ ଆସିଲି ଶୂନ୍ୟ ହସ୍ତ ରେ ,

     ହୃଦୟେ ପ୍ରେମ କୁ ନେଇ 

ସେ ପ୍ରେମ ଟିକକ ତୁମକୁ ପ୍ରିୟା ଗୋ ,

    ଉପହାର ଦେବା ପାଇଁ ।।

ସୁମନ୍ତ ବେହେରା