ବର୍ଣ୍ଣବୋଧ - ରୋହିତ ସେଠୀ

ବର୍ଣ୍ଣର ସମ୍ଭାରେ ଛବି ପସରାରେ

ପୃଷ୍ଠା ତୁମ ଭରପୁର

ଉପର ମଲାଟେ ଜଗି ବସିଅଛି

ଏକ ଧବଳ ମାର୍ଜାର ।

ଛବିଳ ମଧୁ ବର୍ଣ୍ଣବୋଧ ନାମେ

ସାରା ଓଡ଼ିଶାରେ ଖ୍ୟାତ

ଶିଶୁ ମାନଙ୍କର ଅମୂଲ୍ୟ ରତନ

ସତେ ସ୍ଵର୍ଗ ପାରିଜାତ ।

ମାତ୍ରା,ଯୁକ୍ତାକ୍ଷର,ବାରମାସ ନାମ

ପଣକିଆ ଦିଗସୂଚୀ

ମହାପୁରୁଷଙ୍କ ସଂକ୍ଷିପ୍ତ ଜୀବନୀ

ପ୍ରାର୍ଥନା ପୃଷ୍ଠା ମଣ୍ଡିଛି ।

ଇଂରାଜୀ ଆଉ ହିନ୍ଦୀ ବର୍ଣ୍ଣମାଳା,

ପିଲାଙ୍କର ମନ ଜାଣି

ବର୍ଣ୍ଣବୋଧରେ ଖୁନ୍ଦି ଦେଇଛନ୍ତି 

କେତେ ସୁମଧୁର ବାଣୀ ।

କୁନି ପୁସ୍ତକରେ ଲେଖି ଯାଇଛନ୍ତି

କେତେ ଯେ ମହତ କଥା 

ଶିଶୁଙ୍କର ପ୍ରିୟ ଭକ୍ତକବି ଆମ

ବର୍ଣ୍ଣବୋଧର ପ୍ରଣେତା ।

ରୋହିତ ସେଠୀ

ଖଜୁରୀପଡା, କନ୍ଧମାଳ