ଚାଲ ଯିବା ଚାଟଶାଳୀ - ଅମରନାଥ ବାରିକ୍

      ଚାଲ ଯିବା ପିଲେ ଚାଟଶାଳୀକୁ

      ପଢ଼ିବା ସଭିଏଁ ପାଠ ।

      ପାଠ ବିନା କିଛି ନାହଁ ଏ ଜୀବନେ

      ପାଠ ହିଁ କଢ଼ାଏ ବାଟ ।।

      କାନ୍ଧରେ ପକାଇ ବହି ବସ୍ତାନି

      ସାଥିରେ ନେବା ଆସନ ।

      ବେଗି ବେଗି ଯାଇ ବସିବା ନିରବେ

      ପାଠରେ ଲଗାଇ ମନ ।।

      ଗାଇବା ପ୍ରଥମେ ଗୁରୁ ବନ୍ଦନା

      ପ୍ରାର୍ଥନାରେ ମିଶି ଆମେ ।

      କରିବା ପ୍ରଣାମ ବିଦ୍ୟା ଦାୟିନୀଙ୍କୁ

      ମସ୍ତକ ନୁଆଇଁ କ୍ରମେ ।।

      ହାତରେ ଧରିବା ଖଡ଼ି ସିଲଟ

      ଲେଖିବା ଅବନା ଫଳା ।

      ପ୍ରଧାନେ କହିବେ ଯାହା ସେ ଆମକୁ

      ମାନିବାଲୋ "ଚିତ୍ରୋତ୍ପଳା" ।।

      ଜାଣିବା ବିଭିନ୍ନ ବିଷୟ ବସ୍ତୁ

      ଭୂଗୋଳରୁ ଇତିହାସ  ।

      ବଡ ମଣିଷଙ୍କ ଗାଇବା ଜୀବନୀ

      ହୋଇବା ମହାପୁରୁଷ।।

      ହୋଇବା ନିଶ୍ଚୟ ଭଲ ମଣିଷ

      କହିବେ ସମସ୍ତେ ଜ୍ଞାନୀ ।

      ପ୍ରଶଂସା ପାଇବା ଆମେରେ ଜଗତେ

      ହୋଇବା ଜ୍ଞାନର ଧନୀ ।।

      ଜାଣିବା ଅନେକ ରୋଗ ଔଷଧ

      ଯନ୍ତ୍ର ବଳୟର କଥା ।

      ପଢ଼ିଲେ ବିଜ୍ଞାନ ହେବା ବୈଜ୍ଞାନିକ

      ଗଣିତ, ସାହିତ୍ୟ ତଥା ।।

      ଠକିବାନି ଆମେ ଜୀବନେ କେବେ

      ହୋଇବାଟି ବୁଦ୍ଧିଶାଳୀ ।

      କେତେ କଥା ପୁଣି ଶିଖିବା ସେଠାରେ

      ଗଲେ ଆମେ ଚାଟଶାଳୀ ।।

.                             ସମାପ୍ତ

       

  ଅମରନାଥ ବାରିକ୍

କୟାଁ,ମଙ୍ଗଳପୁର, ଯାଜପୁର

  ୯୫୪୦୩୦୮୦୯୫       (ଦିଲ୍ଲୀ)