ଏଇ ଛୋଟ ମୋର ଗାଁ - ଜନ୍ମଜୟ ନାୟକ

ଅନାଦି ଆଦିମ କାଳୁ ଗାଁ ର ନାମ,

କିଏ ଦେଇଛି ଭରି ଏତେ ସୁନାମ | ୧|

ଷଠି ପଞ୍ଚୁଆତି ଦେଖିଛି ଗାଁ ମୋର, 

ଯୂଇରେ ଲୀନ ହେବ ଏଠି ଶରୀର |୨|

ସବୁଜିମା ଭରା ଗାଁ ସବୁଜ କ୍ଷେତ, 

ପିଲାଦିନ ସ୍ମୃତି ଚାଟଶାଳୀ ମିତ  |୩|

ଗାଁ ର ସହ ନଈ ଟି ବସିଛି ସାଙ୍ଗ,

ଘନ ବନାନୀ ଗାଁରେ କେତେ ବିହଙ୍ଗ |୪|

ଗୋଧୂଳି ସମୟ ପକ୍ଷୀର ସେ ରାବ, 

ଶାନ୍ତି ଦୂରେଇ ପାରେନି ଅର୍ଥାଭାବ |୫|

ମୋ ପ୍ରତି ସ୍ପନ୍ଦନେ ଅଛି  ନାମ ଗାଁ ର, 

ଭୂଗୋଳପୋଥିରେ ନାହିଁ ନାମ  ତା'ର|୬|

କେଡେ ସୁନ୍ଦର ଗାଁର ଅଭୁଲା ଛବି , 

ଭାଈଚାରା ଗଣ୍ଠି କେମିତି ଭୁଲିବି? |୭|

ଗଢା ମୁଁ ଯାହା ମାଟି ପାଣି ପବନେ, 

ତାହାକୁ ପାଶୋରି ନ ପାରିବି ମନେ |୮|

ଶସ୍ୟଶ୍ୟାମଳା ଗାଁ ଅରଣ୍ୟ ବୁକୁରେ, 

କେତେ ମଧୁର ସ୍ମୃତି ଅଛି ଏଠାରେ |୯|

ବରଷା ଦିନେ କାଗଜଡଙ୍ଗା  ଭସା, 

ମାଛଧରା ଆଉ ବାଲିଘର ନିଶା  |୧୦|

ଚତୁର୍ଦ୍ଦିଗେ କେତେ ଶୋଭା ଵିମଣ୍ଡିତ, 

ବିଶାଳ  ପ୍ରାସାଦ  ନାହିଁ  ଏଠି ସତ  |୧୧|

ସକାଳ  ସୂରୁଜ  ସଞ୍ଜର  ଚନ୍ଦ୍ରମା, 

ବଖାଣି ନ ହେବ  ଗାଁ  ର ଉପମା |୧୨|

     ଜନ୍ମଜୟ ନାୟକ 

     ଶିକ୍ଷକ, ଚିଲିକା ନୋଡାଲ ହାଇସ୍କୁଲ, ପୁରୀ