ପାଦର ପାଉଁଜି - ପିଙ୍କୁ ରଣବିଡା

ପହେଲା କରି ଚାଲି ସିଖ୍'ଲି

                       ମାଆ,ବାପାର୍ ହାତ୍ ଧରି,

ଛମ୍ ଛମ୍ ମୋର୍ ପାଦର ପାଉଁଜି

            ତାକର୍ ମୁହେ ଦେଇଛେ ହସି ଭରି ।

କୁନି କୁନି ପାଦେ ମୋର୍

                  ଛମ୍ ଛମ୍ କରୁଥିଲା ପାଉଁଜି,

କେତେ ଉସତ୍ ଲାଗୁଥିଲା

                     ସୁନ୍ଦିରୀ ହେଇକରି ସାଜି  ।

ଛୁଆ ନୁ ବଡ୍ ହେଇଗଲି

                   ନାଇଁ ପାର୍'ଲି କିଛି ଜାନି,

ମୋର୍ ସବୁ ଅଲି,ଅଝଟ୍ ସହି

              ମତେ ସବୁ ଦେଉଥିଲେ ଆନି ।

ଛମ୍ ଛମ୍ ମୋର୍ ପାଦର୍ ପାଉଁଜି

                    କରିଦେଲା ମତେ କାଲ,

ମୋର୍ ଉଛୁଲା ବୟସ ଟା

                 କରୁଛେ ମତେ କଲବଲ ।

ସେ ପାଦର୍ ପାଉଁଜି ଆଜି

                  କରିଛେ ମତେ ସାତ ପର,

ଜାହାକେ ନାଇଁ ଚିହ୍ନି କେବେ

            ସେ କରିନେଲା ମତେ ନିଜର୍ ।

ମାଆ,ବାପା ଆଜି କାନ୍ଦୁଛନ୍

                  ମୋର୍ ପାଦର୍ ପାଉଁଜି ସୁଣି,

ବିହା ହେଇକରି ସାଜିଛେ 

                  ମୁଇଁ ଆଉ କାହାର୍ ଘରଣୀ ।

ନାମ-ପିଙ୍କୁ ରଣବିଡା

ଜିଲ୍ଲା-ସମ୍ବଲପୁର

ସ୍ଥାନ-ଠେମରା(ପଦର ପଡା)

ତାରିଖ-11-10-2020