ଛବି କଥା କହେ - ତ୍ରିଲୋଚନ ବୁଡେକ

ମା ବୁଆ ନାଇଁ ପାସେ 

ଆମେ ଦୁହେଁ ନୁହେଁ ଅଲାର୍,

କେନ୍ତା ବଁଚାମି ବୁହେନ୍ କେ

ବସି କରୁଛେଁ ବିଚାର୍ ||

ମୋର୍ ମା ଆମକୁ ଜନମ୍ ଦେଇ

ଗଲା କେତେ ଦୂର୍ ପଲେଇ,

ଖୁଜି ଖୁଜି ଅଥା ହେଇଗଲିଁ 

ନାଇଁ ପାଏଲୁଁ ତାର୍ ଛାଇ  ||

ବୁଆ ଯାଇଛେ ଆହାର୍ ନେଇ

ନାଇଁ ଆଏବାର୍ ଫେରି,

ସାନ୍ ବୁହେନ୍ ଟା ଭୁକେ ସୁଇଛେ 

ମୁଇଁ ମରୁଛେଁ ଝୁରି ଝୁରି ||

ଅଜନା ବାଟେ ବାଟ୍ ଯୁଗିଛୁଁ

ଝନେ ହେଲେ କେ କର୍ବା ଆହା,

କଅଁଲି ଛୁଆ ଆମେ ପେଟେ ଭୋକ୍

ବଁଚିବାର୍ ନାଇଁ ମିଲିବାର୍ ରାହା ||

ସଖାଲୁ ବୁଆ ଯାଇଛେ ଯେ

ଅନ୍ଧାର୍ ହେଲା ନ ନାଇଁ ତାର୍ ଦେଖା,

କେନ୍ତା ଭିକ୍ ମାଗିମୁଁ ଗୋ

କାହାକେ କର୍ମୁ ସଖା ||

ତ୍ରିଲୋଚନ ବୁଡ଼େକ

ଗଇନପୁରା, ଧମା

ସମ୍ବଲପୁର