ଛବି କଥା କହେ - କାହ୍ନୁ ଚରଣ ସାହୁ

ଶାଶ୍ୱତ ପ୍ରେମର ସ୍ବର୍ଣ୍ଣିମ ଅକ୍ଷରେ

ହେବା ପାଇଁ ଲିପିବଦ୍ଧ

ଅନ୍ତର ଆବେଗେ ଜହ୍ନ ଆଲୋକରେ

ରାତି ସାରା କଲ ଯୁଦ୍ଧ ।

ଦୁଇଟି ମନ ଓ ଦେହର ମିଳନେ

ଫଳାଫଳ ଆମେ ଦୁହେଁ

ପରିଚୟ ଶୁନ୍ୟ, ବିଧି ଅଭିଧାନ

ଅନାଥ ଆମକୁ କହେ ।

କଅଁଳ ବୟସ ହୁଅଇ ଅବଶ

କଲେ ଅଳ୍ପ ପରିଶ୍ରମ

ପ୍ରଶ୍ନବାଚୀ ଆମେ ଦୁନିଆ ଆଗରେ

ଧୂଳିମଳି ଆମ ସ୍ବପ୍ନ ।

ଭାଇ ଓ ଭଉଣୀ ଅନେକ କାହାଣୀ

ଆମ ହୃଦୟରେ ଥୁଆ

ଅସହ୍ୟ ଯନ୍ତ୍ରଣା ମଳିନ ଗଞ୍ଜଣା

ଦୁନିଆ କରେନି ଆହା ।

ଶହ ଶହ କୋଟି ମନ୍ଦିର ନିର୍ମାଣେ

କରିପାର ତୁମେ ଦାନ

ଅଥଚ କଦାପି ମନ ବଳେ ନାହିଁ

ଦେବାକୁ ମୁଠାଏ ଅନ୍ନ ।

ଏଣେ ତେଣେ ଖଟି ଅଳପ ଟଙ୍କାରେ

ଆଣେ କୁନି ପାଇଁ କ୍ଷୀର

ଦେବା ବଦଳରେ ଠକାଏ ଦୋକାନୀ

ଅଳ୍ପ ଖାଇ ହୁଏ ଜର ।

ଭଉଣୀ ମୋ ପାଇଁ ଅମୂଲ୍ୟ ସମ୍ପଦ

ଟିକି ହାତେ ଖଟି ପାଳେ

କେବେ ଓପାସରେ ରାତି ଉଜାଗରେ

ଭୋକର ପେଟ ମୋ ଜଳେ ।

କାହାକୁ କହିବି କିଏ ବା ବୁଝିବ ?

ଖଡ଼ି ଧରା ଟିକି ହାତ

ସେଇ ହାତେ ପୁଣି କୋଡ଼ି ଓ କୋଦାଳ

ଧରେ ଖାଇବାକୁ ଭାତ ।

ମାତା ପିତା ସ୍ନେହ ଆମ ପାଇଁ ସ୍ବପ୍ନ

ମାଲିକର ମିଳେ ମାଡ଼

ସହି ହୁଏ ନାହିଁ ନରମ ଶରୀର

ଖରା, ବରଷା ଓ ଜାଡ଼ ।

ଦୁଃଖ ଓ ଯନ୍ତ୍ରଣା ପ୍ରିୟଜନ ଯେହ୍ନେ

ରହିଥାନ୍ତି ସାଥି ହୋଇ

ଖାଇବା ପିଇବା ରହିବା ଶୋଇବା

କନା ଖଣ୍ଡେ ମିଳେ ନାହିଁ ।

କବି ଲେଖେ ବସି ଇତିହାସ ପୋଥି

ବୁଝେନି ନରମ ମନ

ଉତ୍ତର ଖୋଜୁଛୁ ଦେଇକି ପାରିବ

କାହା ପାଇଁ ଆମ ଜନ୍ମ ?

କାହ୍ନୁ ଚରଣ ସାହୁ 

ପଣ୍ଡକାମାଳ, ମ.ରାମପୁର, କଳାହାଣ୍ଡି

ସମ୍ପାଦକ: ସୃଷ୍ଟି ସମ୍ଭାର ସାହିତ୍ୟ ଇ-ପତ୍ରିକା 

ମୋ: 8249520880