ଆଜି ପାଇଁ...... - ରୋହିତ ସେଠୀ

କର୍ଦ୍ଦମାକ୍ତ ପଥ ଅବା କଣ୍ଟକିତ

ତଥାପି ଚାଲିଛି ମୁହିଁ

ଆଜିବି ଜୀବନେ ସଂଘର୍ଷ କରୁଛି

କେବେ ଥକି ପଡ଼ି ନାହିଁ ।

ବାଳୁତ ମୁଣ୍ଡରେ ସଂସାରର ବୋଝ

କେମିତି ପାରୁଛି ବୋହି..?

ଝଡ଼ ଝଞ୍ଜା କେତେ ସହ୍ୟ କରୁଅଛ

ଲୁଚି ଦେଖୁଛନ୍ତି ବିହି । 

ନିରୀହ ନିଷ୍ପାପ ସରଳ ମାନସେ

ଅସୁମାରୀ ସ୍ଵପ୍ନ ଦେଖି

ଘର କୋଣେ ବସି କେବେ କେବେ ମୁହିଁ

ଲୁହରେ ଭିଜାଏ ଆଖି ।

ଭାବନା ମୋହର ଟିକି ପକ୍ଷୀ ପରି

ଉଡ଼େ ମୁକ୍ତ ଗଗନରେ

ଉଦରର ଜ୍ଵାଳା ଅକୁହା ଆବେଗ

ପ୍ରତି ମୁହୂର୍ତ୍ତରେ ମାରେ ।

ଅଭାବ ପାହାଡ଼େ ଠିଆ ହୋଇ ଦେଖେ

ଆନନ୍ଦର ପୟଧାରା

ତୃଷ୍ଣା ମେଣ୍ଟେ ନାହିଁ ବିତୃଷ୍ଣା ମନରେ

ଜୀବନ ଲାଗେ ଅଧୁରା ।

-ରୋହିତ ସେଠୀ,

ଖଜୁରୀପଡା,କନ୍ଧମାଳ