ନିଃସହାୟ ଶିଶୁ - ଅଶୋକ କୁମାର ନାୟକ

ଶିଶୁ ଭଗବାନ ରୂପ,

କେବେ କେବେ ପରିସ୍ଥିତି ଦାସ ହୁଏ

ଶ୍ରମେ ପାଏ ଅଭିଶାପ  l

ପାଠପଢ଼ା ହୁଏ ତା' ପାଇଁ ସପନ

କଲମ ନ ଧରିପାରେ,

ସଲାମ କରେ ସେ ବାବୁମାନଙ୍କୁ ହିଁ

ଧ୍ୟାନ ସତେ ଖଟିବାରେ  !

ନିଃସହାୟ ଶିଶୁ ଜୀବନ ତାହାର 

ଦୁଃଖ ଭାର ବୋହିଥାଏ,

ସରକାରଙ୍କର ସହସ୍ର ଯୋଜନା

ସୁଯୋଗୁ ବଞ୍ଚିତ ସିଏ  !

ସମୟ ସ୍ରୋତରେ ସାଜଇ ଶ୍ରମିକ

ପୁଣି କରେ ଭିକ୍ଷା ବୃତ୍ତି,

ପରିସ୍ଥିତି ହୁଏ ଦୁଃଖେ ମାଗିବାକୁ

ପଶିଥାଏ ଗଳିକନ୍ଦି   l

ବାଧ୍ୟ ବାଧକତାରେ ଏ ଦେଶ ଶିଶୁ

କରିଥାଏ ଏହି କାମ,

ଦେଶର ସମୃଦ୍ଧ ହେବ ନାହିଁ ତେବେ

ସଂଘର୍ଷ ହେଲେ ଜୀବନ  l

ତେଣୁ ଶିଶୁ ପରି କଅଁଳ କଳିକୁ

ପୟରେ ଦଳି ନ ଦିଅ,

ପ୍ରସ୍ଫୁଟିତ ସହ ସୁବାସିତ ହୋଇ

ଚହଟିବ ମହମହ  l

ଶିଶୁ ଶ୍ରମିକର ଏହି ସମସ୍ୟାକୁ

ନ କରିଲେ ସମାଧାନ,

ଦେଶର ଭବିଷ୍ୟ ଅନ୍ଧକାର ହେବ

ଅଧା ରହିଯିବ ସ୍ବପ୍ନ  l

ବାପା ମାଆ ତା' ଥାଆନ୍ତି ଅଶିକ୍ଷିତ

ଖଟି ଖଟି ଦିନ ଯାଏ,

ଶିଶୁ କନ୍ୟା ପୁଣି ଜୀବନ ସଂଘର୍ଷେ

ସ୍ବପ୍ନ ତା'ମିଳେଇ ଥାଏ  l

କେତେ ଯେ ନିରୀହ ଶିଶୁଟିଏ ସିଏ

ମୁଣ୍ଡେଇ ଦ୍ରବ୍ୟକୁ ବୁହେ,

ଭୋକ ଓ ଦାରିଦ୍ର୍ୟ ତା'ର ସହଚର

ମାନସିକ ଦୁଃଖ ସହେ   l

ଆଖିରୁ ଝରେ ତା'ଅଶ୍ରୁ ଧାର ଧାର

ଭୋକ ଉପାସରେ ରହେ,

ରାସ୍ତା କେତେ ବୁଲି ଭିକ ମାଗି ମାଗି

ବିଶ୍ୱାସେ ହାତ ପତାଏ  l

ନିଃସହାୟ ଶିଶୁ ବଳି ପଡ଼େ ଆଜି

କର୍ତ୍ତବ୍ୟର ଦ୍ୱାହି ଦେଇ,

ଫୁଟିବl ଆଗରୁ ଝରିପଡ଼େ ସେ ହିଁ

ପ୍ରସ୍ଫୁଟିତ ହୁଏ ନାହିଁ  l

କେତେବେଳେ ତା'ର ମୁଣ୍ଡରେ ବୋଝେଇ

ପୁଣି ସେ ମାଜେ ବାସନ,

ଆଉ କେତେବେଳେ ଅଇଁଠା ଗୋଟାଏ

ରାସ୍ତାରେ ଖଟେ ଦାଦନ  l

ଅର୍ଥର ଅଭାବ ସାଜଇ ବାଧକ

ଶିଶୁର ଯେ ଚଲାପଥେ,

ପେଟ ଖଣ୍ଡେ ପାଇଁ ବୁଲେ ବାର ଦ୍ୱାର

ଅନ୍ୟ ଆଗେ ହାତ ପାତେ   l

ଶିଶୁ ଶ୍ରମିକ ହିଁ ସମାଜକୁ ନିନ୍ଦା

ଜୀବନେ ଯାତନା ପାଏ,

ଶିଶୁ ଅଧିକାର ଆଇନ ଥାଇ ବି

କ୍ଳେଶ ସହିବାକୁ ହୁଏ  l

   - ଶ୍ରୀ ଅଶୋକ କୁମାର ନାୟକ

           କେନ୍ଦୁଢ଼ିପି, ନୟାଗଡ଼